Ang Tindero

"Pao pao pao!" matod pa ang usa ka lalaki nag nikabyon samtang nagdagan ang bus padulong sa lungsod. "Pila na?" mitubag ang usa ka dalaga. Gitunol dayon ang putos, "baynte pesos ra miga, tulo pa kabuok ang sulod." Tuod man nipalit ang babaye tungod sa kalayo pa sa biyahe sa sunod nga lungsod. Menos kinse para mag alas-dose niadtong higayona. Init ang panahon, apilan pa sa kaabog sa dalan nga among giagian. Pun-an sa kaaso sa sigarilyo nga gibulhot sa mga panday nga nia atubangan nako sa pinaka likod niining bus. Mao kini ang kanunay nga sitwasyon matag Sabado. Ang nagtrabaho sa siyudad magdali og pamauli sa ilang tagsa-tagsa nga lungsod.

Taud-taod sa may eskina nihunong ang bus og nanaog ang manag-uyab. Klaro sa mga bulsita nga ilang dala namalit sila gikan pa sa Colon. Dihay putos nga puno og mansanas og ang usa puno sa mga beste og sapatos. Bisan panaog na naggunitanay gihapon sa ilang kamot. Nabakante dayon ang akong tupad, samot og untol ang lubot sa bus samtang nagkagamay na ang pasahero.

Daghan pang mga kabalayan og daghan pang tao among nalabyan. Ang mga panday padayon gihapon sa pagpanigarilyo og samot kasadya dihang daghang chicks nga nag atang daplin sa dalan. "Hubagang ate oi!" siyagit sa usa. Dayon pangatawa, hasta ako naapil sa agik-ik sa makatakod nga bahakhak nila.

Ang namaligya og ampao mitupad nako dayon gipangutana ko siya, "dako'g halin noy?" "Sus intawon murag gilangaw," tubag dayon niya. "Dad-i og ampao imong mama dong. Baynte pesos ra ang putos." "Taga Carcar ra man pud ko noy oi," maoy akong sulti niya. Nipahiyom siya, nilingi og naglantaw sa gawas.

Nikanaog pa ang ubang pasahero duol sa dakong tindahan. Ala-una y media na. Init gihapon ang panahon, misidlak pa gihapon ang adlaw, og sadya gihapon ang mga panday.

"Lugar lang!" og dungan tuktok sa puthaw gamit ang piso. "Diri ra ko noy," katapusan kong gisulti ngadto sa tindero og ampao dihang niambak ko gikan sa pultahan.